Nytenking rundt bruk av overskotsvarme – Teknoøkonomisk undersøking ved bruk av overskotsvarme frå eit planlagd datasenter i Luster Kommune

Abstract

Global auke i datatrafikk gir behov for nye store datasenter. Desse brukar mykje energi, særleg til kjøling. Om lag 80-90 % av energiforbruket til eit datasenter kjem ut som overskotsvarme. Denne varmen kan og bør nyttast vidare. I Luster kommune, nærmare sagt Hausamoen, har Sognekraft ilag med andre interessentar uttrykt ynskje om å etablere eit 100 MW datasenter. Plasseringa er omtrent 5 km frå Gaupne og er valt på grunnlag av Hausamoen sin gode tilgang på rein og stabil kraft. Dette fører til følgjande problemstilling: (I) Er det teknisk og økonomisk hensiktsmessig å nytte overskotsvarme frå eit datasenter til oppvarming av Lustrabadet? (II) Er det mogleg å etablere eit større fjernvarmenettverk i Gaupne basert på overskotsvarme frå datasenter? For å svare på problemstillinga har vi nytta teori frå litteratur samt datainnsamling gjennom møter med sentrale aktørar. Denne informasjonen har vi nytta i modelleringsverktøyet THERMOS, for å designe eit fjernvarmenett for tre ulike scenario i Gaupne. Resultatet i prosjektet er: Totalkostnaden for scenario 1 er 14,55 Mkr, med ei årleg prosentvis nytting på 0,2 %. Totalkostnaden for scenario 2 er 17,55 Mkr, med ei årleg prosentvis nytting på 0,3 %. Totalkostnaden for scenario 3 er 186,31 Mkr, med ei årleg prosentvis nytting på 6,1 %. Ein får ein svært låg årleg prosentvis nytting av overskotsvarme frå datasenteret, uavhengig av scenario. Datasenterets effekt er for høg samanlikna med kor mykje overskotsvarme Gaupne kan nytte. Får ein ikkje nytte overskotsvarme, bør ein heller ikkje etablere eit datasenter.