Skulevurdering - ekstern eller intern? : rapport frå Sogn og Fjordane si deltaking i det nasjonale prosjektet "Ekstern deltaking i lokalt vurderingsarbeid"

Abstract

Stortinget vedtok våren 1999 å gjennomføre eit treårig forsøksprosjekt der eksterne personar deltar i kvalitetsvurdering i skulen. Sogn og Fjordane er eit av 6 fylke som har vore med i fase II i denne utprøvinga. Statens utdanningskontor har hatt ansvar for prosjektet som er gjennomført ved to vidaregåande- og fire grunnskular i fylket. Hovudmålsettinga har vore å gjere erfaringar med metodar der breitt samansette grupper av eksterne personar går inn og deltar som samtalepartar og ressurspersonar for skular, kommunar og fylkeskommunar. Rapporten drøftar m.a. desse sentrale spørsmåla: - korleis velje fokusområde for vurderingsarbeidet? - korleis rekruttere eksterne deltakarar? - kva type informasjon og skulering trengst ved oppstart ? - korleis utvikle vurderingskriterium ? - kva er eigna organisering og metodar i datainnhentinga ? - korleis melde tilbake vurderingsresultata? - korleis sikre at kvalitetsvurdering fører til kvalitetsutvikling ? Det blir konkludert med at bruk av eksterne deltakarar i skolevurdering er nyttig i forhold til skulens utvikling og legitimitet. Ekstern og intern skulevurdering må sjåast i samanheng. Ein må arbeide vidare med modellar som er minst mogleg kostnadskrevjande. Det blir rådd til at departementet endrar forskriftene for skuleverket slik at skulane jamleg nyttar eksterne deltakarar i vurderingsarbeidet sitt.