Skjermtid – er det så farleg? : Ein litteraturstudie om samanhengar mellom skjermtid og psykisk helse hjå barn og ungdom

Abstract

Skjermteknologi har vorte ein viktig del av kvardagen til både barn og vaksne. Over alt kor me er, omgir me oss med skjermar. Tala frå Ungdata-undersøkinga syner at så mange som 14 prosent av ungdommane i Noreg nyttar meir enn 6 timar skjerm til dagen. Norske lærarar nyttar meir og meir skjermrelatert teknologi i undervisninga si, og med ei markant auke etter at skulane vart stengt i mars, 2020. Ungdata-rapporten syner også at det har vore ei auke i sjølvrapporterte psykiske plager hjå norsk ungdom, sidan 2015, men at tala flata ut i 2020. Tal frå Folkehelseinstituttet, FHI, syner at andelen barn og ungdom med psykiske lidingar har vore aukande frå 2008-2016, og særleg hjå tenåringsjenter. Tala frå FHI syner om lag det same som dei sjølvrapporterte tala frå Ungdata-undersøkinga. Målet med denne oppgåva er å identifisere relevant forskingslitteratur, for så å kunne seie noko om kva konsekvensar forskinga ser at skjermtid har på den psykiske helsa til barn og unge. Resultata syner at skjermtid har små effektar på den psykiske helsa til barn og unge, og at det er andre variablar som speler ei større rolle. Der ein ser ein positiv korrelasjon mellom skjermtid og psykiske vanskar, er ofte konsekvensane større for jenter, enn gutar. Det ser ut til at det er ulikt korleis effektane av skjermtid er fordelt, etter kva type media barna nyttar. Sosiale media har størst konsekvensar for den psykiske helsa og jenter nyttar seg meir av sosiale media, enn gutar. Ein artikkel har sett på total skjermtid, frå både skulearbeid og fritid. Den finn ikkje negative effektar av skjermtid knytt til skulearbeid. Litteraturstudien syner at korrelasjonen mellom skjermtid og psykisk helse hjå barn og unge er låg. Det ser ut til at andre faktorar som fysisk aktivitet og søvn speler ei minst like stor rolle.