Utdanning for «empowerment»? Ein kvalitativ studie om utdanningsprogram for marginaliserte unge jenter i Tanzania.

Abstract

Denne masteroppgåva har som formål å gi ny kunnskap om temaet utdanning for «empowerment» gjennom å sjå på tre ulike utdanningsprogram for marginaliserte unge jenter i Tanzania. Oppgåva si problemstilling er som følger: Korleis kan ulike typar utdanningsprogram for marginaliserte unge jenter i Tanzania medverke til at jentene blir «empowered»? Det teoretiske rammeverket eg har brukt som analyseverktøy for å belyse studien sine funn er Askheim sine teoriar om «empowerment», Freire sin teori «de undertryktes pedagogikk» og Bourdieu sine formar for kapital, samt kjønnsteoretikarane Boserup & Chodorow. Oppgåva er ein samfunnsvitskapeleg studie som har nytta kvalitativ metode for å svare på oppgåva si problemstilling. For å samle inn empiri har eg nytta semistrukturert intervju av to informantar, og kvalitativ innhaldsanalyse av tre tekstar som omhandlar tidlegare forsking på temaet. Korleis utdanningsprogramma medverkar til at unge marginaliserte jenter oppnår «empowerment» er vanskeleg å slå fast, då korleis dei ser på «empowerment» skil seg frå teoretikarane sitt syn på «empowerment». Nokre av funna mine viser at utdanningsprogramma har medverka til auka refleksjon over eigen situasjon og kritisk tenking for nokre av jentene, samt auka ferdigheiter i ulike yrker. Ein kan ikkje slå fast at utdanningsprogram medverkar til «empowerment» for unge marginaliserte jenter, men ein kan slå fast at programma kan, for nokre av jentene, medverke til både auka ferdigheiter, kritisk tenking og refleksjon, samt auka sosial kapital gjennom eit sterkt kollektiv samhald. Det viser seg at «empowerment» er eit vanskeleg omgrep for mange å definere, og skulle ein bare lagt utdanningsprogramma sin fellesnemner om omgrepet til grunn kunne ein konkludert med at utdanningsprogramma ikkje i særleg stor grad medverkar til «empowerment». Dersom ein likevel ser på dei ulike elementa av «empowerment» ser ein at funna mine viser at jentene sjølv seier at dei føler seg «empowered».