Identitet og mangfald i klasserommet: Ei kvalitativ studie om kva som formar lærarar sin praksis knytt til elevar med minoritetsbakgrunn sin identitet og mangfald i samfunnsfaget.

Abstract

Dette forskingsprosjektet er ei kvalitativ studie om kva som formar eit utval lærarar sin praksis kring elevar med minoritetsbakgrunn sin identitet og mangfald i klasserommet, med spesielt fokus på samfunnsfaget. Studien er skriven frå eit lærarperspektiv, og rettar fokuset mot lærarane si forståing og perspektiv på identitet, samt lærarane si tilnærming til identitet og mangfald i møte med elevar med minoritetsbakgrunn på skulen og i undervisning. Den rettar også fokuset mot kva eksterne faktorar som påverkar lærarane sin praksis. Det empiriske materialet byggjer på individuelle semistrukturerte intervju med fem lærarar frå ulike ungdomsskular i Noreg. Resultata er tolka og analysert opp mot ei essensialistisk og ei konstruktivistisk tilnærming til identitet, John Goodlad sin læreplanmodell, Michael Lipsky sin teori om bakkebyråkratar, Grimen & Molander sin teori om profesjonelt skjønn, samt Handal & Lauvås sine tankar kring praksisteori Informantane i studien kan seiast å ha eit konstruktivistisk og individualistisk syn på identitet, og har to ulike tilnærmingar til identitet i møte med elevar med minoritetsbakgrunn: ein sosial-relasjonell og ein fagleg. Hovudfunna i studien viser at lærarane tolkar læreplanen på ulike måtar, og at praksisen deira i møte med elevar med minoritetsbakgrunn sin identitet og mangfald i klasserommet spring ut av det profesjonsmessige skjønnet, i kombinasjon med lærarane sin praksisteori. Dei utøvar dette profesjonsmessige skjønnet heller enn å la seg forme av læreplanar, rettleiande dokument eller teoriar om det fleirkulturelle samfunnet og fleirkulturell pedagogikk. Lærarane opplev at dei ikkje får rettleiing utanfrå når det kjem til tematikken, og det kjem fram at lærarane sin praksis blir påverka av eksterne faktorar som forholdet mellom innhaldet i læreplanen og tid, perspektiva og innhaldet i lærebøkene, samt implementering av ny læreplan.