Ein kvalitativ studie om lærarar sine erfaringar av å bruke nettbrett i undervisninga for å tilpasse opplæringa i barneskulen

Abstract

I dagens samfunn kjem det stadig meir teknologi. Samstundes som dette skjer blir skulane meir digitalisert. Fleire skular tek i bruk digitale verktøy og fleire elevar får eigne nettbrett. Denne studien handlar om lærarar sine erfaringar av å bruke nettbrett i undervisninga for å tilpasse opplæringa i barneskulen. Formålet med undersøkinga var å få eit innblikk i lærarane sine tankar rundt dette. Gjennom oppgåva har eg arbeida etter følgjande problemstilling: Korleis kan lærarar bruke nettbrett i undervisninga for å tilpasse opplæringa i barneskulen? For å svare på problemstillinga på best mogleg måte formulerte eg tre forskingsspørsmål: 1. Kva for nokre erfaringar har lærarar med å bruke nettbrett i undervisninga? 2. Korleis opplever lærarane at nettbrettet kan bidra for å tilpasse opplæringa? 3. Korleis kan bruk av nettbrett skape motivasjon hos elevane? Studien har brukt ein kvalitativ forskingsmetode med hermeneutikk som vitskapleg perspektiv. Datainnsamlinga blei gjort ved fire semistrukturerte intervju med fire lærarar som arbeider med nettbrett i undervisninga innanfor 1.-7. trinn på barneskulen. Studien sine teoretiske tilnærmingar for å belyse og analysere problemstillinga er hovudsakleg sosiokulturell læringsperspektiv, teori om tilpassa opplæring, nettbrett og digitale ferdigheiter, nettbrett og tilpassa opplæring og motivasjon. Med utgangspunkt i det transkriberte datamaterialet og intervjuguiden valde eg å bruke forskingsspørsmåla mine som utgangspunkt for å utvikle fire kategoriar for å presentere funna mine og drøfte desse opp mot teori. Desse kategoriane er Tilpassa opplæring, Lærarens erfaringar med nettbrett, Nettbrett og tilpassa opplæring og Nettbrett og motivasjon. Dei viktigaste funna frå denne undersøkinga er at når ein brukar nettbrett i undervisninga opnar det opp for fleire moglegheiter for elevane. Lærarane kan enklare tilpasse opplæringa til kvar elev ut i frå deira nivå. Nettbrettet opnar opp for mange måtar å løyse ei oppgåve på. Lærarane meiner at fleire applikasjonar er gode verktøy for å legge til rette undervisninga. Eit viktig funn er at når ein nyttar nettbrett i undervisninga er det enklare å legge til rette for at elevane skal meistre ettersom mykje vert tilpassa av seg sjølv når ein brukar applikasjonar. I tillegg er elevane veldig motiverte for å arbeide med nettbrett i undervisninga.