Utvalde kulturlandskap i jordbruket (UKL), område Lærdal, Sogn og Fjordane Del 1: Historiske utviklingstrekk for kulturlandskapet i Lærdal

Abstract

Kulturlandskapet i Lærdal er utpeika som «nasjonalt utvald kulturlandskap i jordbruket» (UKL Lærdal). Denne ordninga er ei oppfølging av nasjonale mål om å ivareta variasjonen innan det tradisjonelle kulturlandskapet i landet. Kulturlandskap med lang kontinuitet og stor artsrikdom har framleis stor utbreiing i Lærdal.

Denne rapporten er del 1 i ein serie på tre delar om UKL Lærdal. Den omhandlar kulturhistorien til sentrale kulturmarkstypar, kulturminne og kulturmiljø i «midtre» Lærdal. Innleiingsvis er det ein kort gjennomgang av utviklinga av jordbruket i bygda med fokus på bruk av innmark og utmark. Tradisjonen med kunstig vatning og etablering av vatningsveiter blir omtala. Lærdalselvi er ei livsnerve for jordbruksbygda og har til alle tider vore ei viktig matforsynings- og inntektskjelde. Utviklinga av strandstaden Lærdalsøyri har også vore sentral for utviklinga av kulturlandskapet i heile dalføret. Den sentrale plasseringa inst i Sognefjorden og relativt sikre vegsamband over Filefjell, gjer at dalføret har ei rik veghistorie med veganlegg frå ulike tidsperiodar. I dalføret er det også fleire freda bygg, tradisjonell bygningsmasse og ulike kulturminne som er lite forstyrra av moderne inngrep.