Tilrettelegging for utvikling av matematisk kompetanse i algebraoppgåver : Ein analyse av to norske læreverk med fokus på matematisk kompetanse i algebra

Abstract

Forskingsspørsmålet for denne masteroppgåva er: Kva for nokon matematiske kompetansar legg algebrakapittelet i to norske læreverk til rette for at elevar på 8. trinn får utvikla?.

For å svara på forskingsspørsmålet er det vorte utført ein lærebokanalyse, der det er vorte nytta ein kombinasjon av kvalitativ og kvantitativ metode. 419 oppgåver får læreverka Tetra 8 og Faktor 8 er undersøkt og analysert for å finna ut kva for ein algebraisk aktivitet oppgåvene stimulerer til, og kva for ein matematisk kompetanse oppgåvene legg til rette for.

Det er tatt utgangspunkt i to rammeverk for matematisk kompetanse. Kilpatrick sitt rammeverk deler matematisk kompetanse inn i fem komponentar, som i følgje han må utviklast parallelt for at eleven skal utvikla matematisk kompetanse. I Niss sitt rammeverk er matematisk kompetanse delt inn i åtte delkompetansar. Niss hevdar at dei åtte delkompetansane består av å kunna bruke bestemte typar matematiske aktivitetar basert på spesifikk kunnskap og ferdigheit. GTG - modellen til Kieran, deler skulealgebraen inn i tre aktivitetar, og er brukt til å undersøka kva for nokon algebraiske aktivitetar oppgåvene i læreverka stimulerer til. Ved å arbeide med oppgåver som stimulerer til ulike algebraiske aktivitetar kan elevar utvikla sin matematiske kompetanse. Analysen er todelt, den kvantitative delen viser fordelinga av oppgåver innanfor dei ulike komponentane og delkompetansane, og kva for ein algebraisk aktivitet oppgåvene stimulerer til. Den kvalitative delen av analysen gjev mogelegheit til å analysera nærare eit utval av oppgåver.

Resultata viser at fleirtalet av oppgåvene i læreverka går under komponentar eller delkompetansar som gjev elevane ferdigheitstrening. Relativt få oppgåver i forhold legg opp til resonnering, argumentasjon og bevis.