"Stolte elevar, stolte lærarar, stolte foreldre! Det er slike kjenslelada augneblink som ikkje kan beskrivast. Det kjennast som...magi..." - Læring i musikkprosjekt i grunnskulen

Abstract

«Ein trudde at fokus på teori skulle gjere norske skulebarn betre – men forsking viser at barn som får jobbe med praktisk- estetiske fag gjer det betre også i akademiske fag. Det får norske barn i særs liten grad moglegheit til – for det har norske politikarar bestemt» (Jensvoll, 2013).

I denne oppgåva vil vi prøve å belyse kva for læring som ligg i å jobbe med musikkprosjekt i skulen. Vi vil sjå på kva for læring det er i gjennomføring av eit slikt prosjekt, og korleis musikkprosjektet kan bidra til å utdanne elevane i dei sosiale ferdigheitene.

Vi har valt å nytte ein kvalitativ forskingsmetode, der tre lærarar med ulik bakgrunn og kompetanse innanfor musikk er intervjua. Vi gjennomførte semistrukturert eller delvis strukturert intervju med ein open dialog med informantane.

Problemstillinga er som følger: «På kva måte opplever lærarar i grunnskulen at dei kan styrkje arbeidet med å utdanne skapande, samarbeidande og danna elevar gjennom musikkprosjekt?»