Bruken av rekning i alle fag

Abstract

Problemstilling Korleis trekk grunnskulelærarar inn rekning som grunnleggjande ferdigheit på barneskulen? Teori Teorien som er valt er sentral i forhold til problemstillinga vår og temaet rekning i alle fag. Me har blant anna valt å definere tre omgrep som er heilt vesentlege i oppgåva vår, «grunnleggjande ferdigheiter», «rekning som grunnleggjande ferdigheit» og «motivasjon». Nokre av Vygotsky sine teoriar er også valt fordi dei er relevante i forhold til matematikkspråket og sosiokulturell teori. Siste del av teorikapittelet handlar om effekten av tverrfagleg undervisning. Metode I denne oppgåva har me valt å bruke den kvalitative forskingsmetoden. For å finne svar på problemstillinga vår har me nytta oss av både observasjon og intervju. Resultat Resultata er presenterte i samsvar med forskinga si rekkefølgje. Det første kapittelet i denne delen omhandlar observasjonane som blei gjennomført, og deretter kjem presentasjon av intervjua me har gjort. Intervjua er delt inn i tre underkapittel som handlar om fokuset og viktigheita ved å trekkja inn rekning i andre fag, bruken av rekning i andre fag og til slutt utfordringar som lærarar kan møte på. Konklusjon Konklusjonen handlar om at bruk av rekning i alle fag kan fremja læring hos elevane på barneskulen. Forskinga har gjeve oss fleire eksempel på metodar som lærarar brukar i undervisninga, og kva dei meiner om å trekkje rekning inn i dei andre faga. Me har fått innsyn i viktigheita og ulike utfordringar innanfor det aktuelle temaet. Etter forskingsprosjektet kan me konkludere med at informantane brukar og fokuserer på rekning i alle fag, synes det er utfordrande til tider, og meiner at det skal inkluderast i undervisninga. Nøkkelord Grunnleggjande ferdigheiter, rekneferdigheita, kompetansemål, motivasjon, tverrfagleg undervisning, språk og samhandling.