Omsetjing og tilpassing av MSLQ: IMTE-rapport nr. 1/16

Abstract

Denne rapporten skildrar prosedyren for omsetjing og tilpassing av Motivated strategies for learning questionnaire (MSLQ) til bruk i prosjektet «Improvisation in Teacher Education: Curricula and Practice in Dynamic Interplay (IMTE)» finansiert av Norges forskningsråd. MSLQ er eit kurs-spesifikt sjølv-rapporteringsskjema som måler studentane sin motivasjon og sine læringsstrategiar. Skjemaet er mykje nytta innan pedagogisk forsking internasjonalt, også innan høgare utdanning (Credè & Phillips, 2010). Instrumentet inneheld 81 ledd fordelt på 15 sub skalaer. Instrumentet har to hovudseksjonar; motivasjon og læringsstrategiar. I rapporten viser vi korleis skjemaet vart omsett frå engelsk til norsk og vidare språkleg og statistisk validert i høve til aktuell kontekst. Reliabilitetsanalysane viste at dei aller fleste ledda i MSLQ lot seg tilpasse til ein generell versjon. Unntaket var sub skalaen «Task value» som hadde eit enkeltledd som ikkje lot seg tilpasse. Ekskludering av dette leddet svekka ikkje sub skalaen i høve til mål på indre konsistens. Vår vurdering er at den omsette og tilpassa versjonen av MSLQ kan nyttast for å måle studentar sin motivasjon og læringsstrategiar innanfor utdanningsløp i høgare utdanning. Men det kan vere behov for å gjere grundigare studiar av den tilpassa versjonen når det gjeld ekstern validitet.