| dc.description.abstract | Dette er ei bacheloroppgåve i pedagogikk og elevkunnskap med fordjuping i matematikk. Motivasjon og meistring er to viktige faktorar i alt læringsarbeid, også i arbeid med å utvikla reknekompetanse. Som lærar er det viktig å kjenna til tiltak som kan auka motivasjon og meistring for læring. Målet med oppgåva mi er å sjå om bruk av konkretiseringsmateriell i matematikkundervisninga vil vera med å fremja motivasjon og meistring hos elevane.
Problemstillinga i oppgåva er «Kan bruk av konkretiseringsmateriell i matematikk fremja elevar sin motivasjon og meistring?»
I teoridelen av oppgåva er eg innom ulike læringsteoriar knytt opp mot teoretikarar som blant anna Bandura, Piaget og Vygotsky. Teori om konkretiseringsmateriell, motivasjon, meistring og tilpassa opplæring er også med i denne delen av oppgåva.
Eg har brukt observasjon og læringstest som metode for mi empiriske datainnsamling. Eit utval av elevane blei observerte for å undersøka motivasjonen til elevane, og ein læringstest i heile klassen for å sjå om dei meistra oppgåvene. Undervisningsopplegget blei først gjennomgått utan bruk av konkretiseringsmateriell, før ein ny gjennomgang med bruk av konkretiseringsmateriell. Elevane blei observerte i begge øktene, og læringstestane blei gjennomførte etter kvart av undervisningsopplegga. Ei kjelde til drøfting i opplegget mitt, og dermed grunnlag for reliabilitetsdiskusjon, er at elevane suksessivt gjekk gjennom same undervisningsopplegg to gonger.
Resultata peikar mot at bruk av konkretiseringsmateriell er viktig for å auka motivasjon og meistring hos elevar. Elevane med lågast læringsføresetnad aukar motivasjon og meistring i opplegget. Eg kan sjå at bruk av konkretiseringsmateriell i undervisninga kan vera eit godt verkemiddel til oppnåing av tilpassa opplæringa. På denne måten vert lærestoffet enklare å forstå for heile elevmangfaldet. | nb_NO |
