Utforskande undervisning: I kva grad kan me identifisera ei utforskande matematikkundervisning ved å måla endringar i elevane sine haldningar?

Abstract

I vårt Forskings- og Utviklingsarbeid ville me ha fokus på ulik matematikkundervisning. Målet med dette var å utvikla vår eigen praksis, og me utforma difor eit undervisningsopplegg som me prøvde ut. Problemstillinga for vårt arbeid var: I kva grad kan me identifisera ei utforskande undervisning ved å måla endringar i elevane sine haldningar? Haldningar og undervisning er i eit refleksivt relaterande påverknadsforhold. Ved å sjå etter endring i haldningar hjå elevane, ville me forsøkja å identifisera element frå undervisninga som gav desse utslaga. Ved hjelp av dette kunne me og finna ut om me hadde lukkast i å skapa utforskande matematikkundervisning. I teorien skil me mellom tradisjonell og utforskande undervisning, og ser på kva som kjenneteiknar klasseromsaktivitetane sin struktur, oppgåvene elevane arbeidar med og klasseromsdiskursen i desse. Strukturen for vår analyse har same inndeling. Me brukte kvalitative og kvantitative forskingsmetodar for å henta inn data frå elevane. Eit spørjeskjema med lukka og opne spørsmål vart nytta, saman med semistrukturert intervju. Utvalet vårt var ein 8. klasse. Data vart samla inn før, undervegs og etter ein praksisperiode på tre veker, og bar i seg element frå aksjonslæring. Resultata me fann i vårt forskingsarbeid var at i løpet av tre veker såg me fleire markerte endringar i elevane sine haldningar. Likevel var det berre tre element frå undervisninga me kunne identifisera og plassera inn under utforskande matematikkundervisning. Desse er praktisk aktivitet, samarbeid og dialog, i vårt opplegg med matematiske prosessar i fokus. Det var fleire andre element som og gav haldningsendringar, utan at me kan knyta dei til utforskande undervisning. Ein fellesnemnar for desse er variasjon. Elevane vurderte heilskapen, og gav uttrykk for at variasjon i aktivitet, struktur, oppgåver og dialog var noko dei verdsette. Me ser at fleire av elementa dei etterlyser kan ha potensial for å skapa ei undersøkjande undervisning. Til sist vil me poengtera at dei endringar i haldning me såg ikkje er varige, men berre kan knytast til det aktuelle tidsrommet.