Escape room i matematikkundervisninga i begynnaropplæringa

Abstract

Føremålet med denne masteroppgåva har vore å søka innsikt i escape room som undervisningsmetode i matematikk på begynnaropplæringa. For å undersøkja problemområdet har eg formulert to forskingsspørsmål som eg har analysert og diskutert ut frå innhenta datamateriale, teori og tidlegare forsking. Datamateriale vart henta inn ved å laga og gjennomføra eit escape room med tre elevgrupper på 2. trinn, og intervjua nokre av elevane i etterkant. Det fyrste forskingsspørsmålet handla om kva oppgåvetypar som er føremålstenlege å bruka i eit matematisk escape room med elevar på 2. trinn. Ut frå rammeverket til Stein og Smith (1998) analyserte eg at escape roomet innehaldt to oppgåver som stilte låge kognitive krav, og to oppgåver som stilte høge kognitive krav. Med utgangspunkt i funn frå analysen har eg diskutert kva oppgåvetypar som er føremålstenlege i forhold til faktorane tid og samarbeid. Tidsaspektet er vesentleg i eit escape room, og er difor ein faktor som har vorten diskutert i forhold til oppgåvetypar. I tillegg er escape room eit lagspel, noko som gjer samarbeid til ein sentral faktor. Ut frå analyse av gruppesamtalar, elevarbeid og intervju har eg diskutert at det i eit matematisk escape room på 2. trinn kan vera føremålstenleg å ta i bruk oppgåver som stiller låge kognitive krav. Ved å ta i bruk oppgåver som stiller låge kognitive krav vil ein tidsmessig kunna gjennomføra fleire oppgåver, noko som igjen kan bidra til at ein får inkludert oppgåver som fleire elevar meistrar. Når elevane arbeidar med oppgåver som dei meistrar, viste analysen min at gruppene samarbeida betre. Alle elevane bidrog, og ingen meldte seg vekk frå arbeidet. Samtidig har eg diskutert at dersom ein ynsker at elevane skal fullføra escape roomet og klara oppdraget, kan det vera ein fordel å inkludera oppgåver som stiller låge kognitive krav. Studiens andre forskingsspørsmål handla om kva problemløysingsstrategiar elevane tok i bruk i arbeidet med det matematiske escape roomet. For å undersøkja det andre forskingsspørsmålet analyserte eg kva problemløysingsstrategiar elevane brukte for å koma seg vidare i og løysa escape roomet, og ikkje i arbeidet med dei enkelte oppgåvene. Eg fann at elevane til saman brukte ulike problemløysingsstrategiar 84 gonger. Dei aktuelle strategiane var rettleia resonnering, logisk resonnering, forenkla problemet, sjå etter mønster, gjett og sjekk og konkretiser. Med bakgrunn i at problemløysing er ein del av kjerneelementa i matematikk (Kunnskapsdepartementet, 2019), har studien vist at escape room kan vera ein undervisningsmetode som kan knytast til kjerneelementet utforsking og problemløysing