Ein kvalitativ studie om matematikksamtalar på 5.trinn ved bruk av fysisk aktivitet i undervisninga.

Abstract

I følgje Lerum et al. (2021) har bruk av fysisk aktivitet i undervisninga fått ein stadig større plass i norsk skule det siste tiåret. Innføringa av det nye tverrfaglege temaet folkehelse og livsmeistring i den nye læreplanen (LK20) viser Kunnskapsdepartementet (2019) si satsing på fysisk aktivitet og helse blant barn og unge. I tillegg til fysisk aktivitet har det også vore eit aukande fokus på kommunikasjon mellom elevar og deira deltaking i matematikksamtalar. Det finnast lite forsking på desse to tema kombinert og studien ønsker dermed å bidra med ny forsking på dette feltet. På bakgrunn av dette er følgjande forskingsspørsmål adressert: Kva kjenneteiknar elevar sine matematikksamtalar i ein 5.klasse når fysisk aktivitet inngår i undervisninga? For å kunne svare på studiens forskingsspørsmål er det blitt gjennomført ein kvalitativ enkelkasusstudie i ein 5.klasse. Vi har nytta oss av teori og tidlegare forsking innan matematikksamtalar for å svare på forskingsspørsmålet. Basert på dette har vi utforma eit teoretisk rammeverk som tar utgangspunkt i Herheim (2016) sine samtalekvalitetar, Alrø og Skovsmose (2002; 2006) sin IC-modell, Røsseland et al. (2022) sine spørsmålstypar, Herheim (2011) sine kommunikasjonsmønster og Mercer (1996) sine samtaleformer for å analysere og diskutere datamaterialet. For å gå i djupna på samtalane blei det gjort observasjonar, lyd- og videoopptak av totalt 14 elevar fordelt på fire grupper. Undervisningsøkta hadde geometri og måling som tema og blei gjennomført i ein gymsal. Utifrå analyse og diskusjon er det blitt synleggjort at fysisk aktivitet har potensiale for å identifisere alle interaksjonskvalitetane som er nemnt ovanfor, men i ulik grad. Det er også blitt gjort andre interessante funn som tar føre seg den fysisk aktivitetens påverknad på samtalane, det matematikkfaglege fokuset og sosiomatiske normer. Ein annan hensikt med studien er å syne korleis ein kan nytte seg av fysisk aktivitet i matematikkundervisninga.