Å ta val og oppleve meining – Ein kvalitativ studie om elevmedverking i kroppsøvingsundervising

Abstract

I denne oppgåva undersøkjer vi kva som skjer når vi lar elevar ta val i kroppsøving, og kva dei opplev som meiningsfullt med ei slik undervising. Gjennom ei utforskande tilnærming til undervising er ambisjonen å skape forståing for korleis elevar kan medverke gjennom å ta val, gi skriftlege tilbakemeldingar og gjennom dialog, og bruke denne kunnskapen i profesjonsutøving. Følgjande problemstilling er formulert: “Kva skjer når vi invitera elevar i 4. og 5. klasse til å ta val i kroppsøvingsundervising, og kva opplevde dei som meiningsfullt?” Masteroppgåva er skriven ved Høgskulen på Vestlandet (HVL) campus Sogndal under fakultet for lærarutdanning, kultur og idrett. Metodisk brukast ei kvalitativ tilnærming med observasjon og spørjeskjema. Utvalet var to 4. klassar og ein 5. klasse på ein barneskule på Vestlandet. Studien belyser elevanes oppleving av å ta val i undervisinga, samt kva elevane opplevde som meiningsfullt gjennom spørjeskjema. I spørjeskjemaet fekk elevane moglegheit til å reflektere over si eiga læring, vere kritiske og kome med tilbakemeldingar. Analysen av spørjeskjema får fram at elevar opplev undervising som meiningsfullt ved at dei får vere med å medverke, samt samarbeide med andre i klassen. Undersøkinga av vala elevane gjorde i undervisinga viser at idrettsdiskursen i kroppsøvingsfaget framleis har ei sterk rolle, og at ballspel er populært blant vala til elevane. Det var også stor forskjell i val av aktivitetar blant kjønna. Studien viser at samarbeid med lærar og medelevar spelar ei stor rolle i kva elevane opplev som meiningsfullt. Funna kasta eit lys på nødvendigheita av at elevar får medverke i undervisinga, og at det er ei grunnleggjande ferdigheit som er sterkt knytt til elevars identitetsdanning. Oppgåvas funn kan medverke til å føre kritiske diskusjonar kring idrettens sterke innflytelse, forskjell mellom kjønna, val, vanar, haldningar og danning i kroppsøvingsundervisinga. Kunnskapen frå oppgåva belyser rolla som kroppsøvingslærar og profesjonsutøvar, noko forfattarane konkluderer med at er avgjerande for utvikling av lærarprofesjonen