Lønnsemd i norsk rekneskapsførarbransje - ei kvantitativ samanlikning av lønnsemdsmål hjå kjedetilknytte og frittståande rekneskapsførarverksemder

Abstract

Bakgrunn for studiet var ein tidlegare kvalitativ studie av rekneskapsførarverksemder i Noreg, der det ikkje vart observert vesentlege forskjellar i kvalitet på rekneskap utarbeida av kjedetilknytte verksemder samanlikna med frittståande. I samband med dette var det ønskje om å undersøka ulikskapar mellom kjedetilknytte og frittståande verksemder i ei kvantitativ undersøking, med fokus på lønnsemd. I vår studie vart 315 norske rekneskapsverksemder utvald og undersøkt, der 144 var kjedetilknytte medan dei resterande 171 var frittståande. Tal på driftsresultat per tilsett, samt data på nøkkeltala totalkapitalrentabilitet, eigenkapitalrentabilitet, likviditetsgrad 1, gjeldsgrad og eigenkapitalandel hjå kvar einskild verksemd vart samla inn frå Brønnøysundregistrene ved bruka av Bisnode og nettsida www.proff.no for å evaluera lønnsemd. Samanhengar mellom kjedetilknyting og lønnsemdmåla vart studert ved bruk av multiple regresjonsanalysar, kontrollert for alder, organisasjonsform, tal på tilsette, lokalisering og storleik. Resultat frå våre regresjonsmodellar synte at kjedetilknyting hadde signifikant negativ effekt på høvesvis driftsresultat per tilsett, totalkapitalrentabilitet, eigenkapitalrentabilitet og likviditetsgrad 1. Konklusjon frå funn er at kjedetilknyting kan ha negative effektar på lønnsemdmål hjå norske rekneskapsverksemder. Tal frå multiple regresjonsanalysar viste samstundes at våre regresjonsmodellar kunne forklara lite av den totale variansen til innsamla data. Det kan såleis tenkjast at andre vesentlege forklaringsvariablar bør inkluderast, og eventuell vidare forsking på området kan difor vere av interesse.