Kva skal til for at distriktskommunar skal lykkast med kommunalt akutt døgnopphald?

Abstract

Bakgrunn: Samhandlingsreforma vart innført i 2012. Reforma gjev kommunane eit større ansvar for helsetenestene. I 2011 kom det ny lov om Helse- og omsorgstenester, § 3.5 gir kommunane plikt til å tilby øyeblikkeleg hjelp døgnopphald. (I studien nyttast omgrepet Kommunalt akutt døgnopphald). Plikta trer i kraft januar 2016. Mange kommunar har etablert denne typen tilbod frå 2012-2015 då regjeringa har vektlagt ei gradvis innføring. Andre kommunar har enno ikkje etablert denne typen tilbod. Mål: Målet med studien er å få kunnskap om korleis ein einskild distriktskommune har lykkast med oppstart og drift av kommunalt akutt døgnopphald, og kva som eventuelt har bidrege til det. Metode: Det er i studien nytta kvalitativ metode, med semistrukturerte, individuelle intervju. Tre profesjonsarbeidarar som arbeider i kommunalt akutt døgnopphald har vorte intervjua. I analysen av datamaterialet vart det nytta systematisk tekstkondensering som analysemetode. Resultat: For å kunne lykkast med kommunalt akutt døgnopphald i ein distriktskommune er det nødvendig med samhandling. Særleg samhandling med spesialisthelsetenesta, andre aktørar innan kommunehelsetenesta og samhandling innan eiga avdeling er vektlagt. Vidare er det nødvendig med engasjerte medarbeidarar innan kommunen, og det at kommunen innehar personell med kunnskap og kompetanse på området. Konklusjon: Samhandling, engasjement, kunnskap og kompetanse vert sett på som avgjerande for å lykkast med kommunalt akutt døgnopphald. Studien kan gi ein overføringsverdi til eigen og andre kommunar som enno ikkje har etablert denne typen tilbod.