Sirkulærøkonomi – ny agenda for norsk varehandel?

Abstract

I denne masterstudien undersøker vi korleis bedrifter innan norsk varehandel kan bli meir sirkulære. I tillegg forsøker vi å rydde opp i begrepet sirkulærøkonomi. Vi har nytta kvalitativ forskingsmetode med sekundærdata frå offentlege og etablerte aktørar som empiri for å svare på problemstillinga, samt ei tilnærming til løysing som er inspirert av konstruktiv metode. Sirkulærøkonomi har fått aukande merksemd dei siste åra, men dei eksisterande definisjonane og beskrivingane av fenomenet er sprikande. Funna våre tyder på at sirkulærøkonomi er eit konsept prega av holisme, og at det difor er tfordrande å samle alt det kan innebere under eitt. Funna våre avdekker òg behov for kunnskap om og ansvarsfordeling knytt til sirkulærøkonomi. I tillegg ser vi eit behov for teoretiske rammeverk som tek like mykje omsyn til andre ledd i verdisirkelen som til produsentane. Vi konkluderer studien med vår eigen definisjon av sirkulærøkonomi som vi meiner treffer studien si avgrensing, samtidig som den er generell nok til å kunne nyttast utover denne avgrensinga. Denne definisjonen er: Sirkulærøkonomi er eit regenerativt økonomisk system som baserer seg på lukka verdisirklar og har til hensikt å eliminere avhengigheitsforholdet mellom økonomisk vekst og ressursbruk, dette gjennom strategiar som minimerer utvinning av ressursar, reduserer forbruk og avskaffar avfall som konsept. I tillegg legg vi fram vårt eige strategiske rammeverk som forslag til løysing på problemstillinga. Dette rammeverket har fått namnet Mellomledd-rammeverket, og er tilpassa norsk varehandel. Det består av tilsaman seks sirkulære strategiar som seljaren kan nytte ut mot leverandørane og kundane sine, og er tufta på samarbeid, ansvarleggjering, informasjon og digital teknologi