Effekt av sedasjonsprotokoll til respiratorpasientar - ei systematisk oversikt og metaanalyse

Abstract

Bakgrunn Ei sentral oppgåve for intensivsjukepleiarar er å vurdere og dokumentere sedasjonsnivået til respiratorpasienten. Dette kan være utfordrande då vurderingane er subjektive og avhengig av kvar enkelt intensivsjukepleiar sin kompetanse. Sedasjonsprotokoll blir brukt for å optimalisere respiratorpasienten sitt sedasjonsnivå.

Hensikt med studien er å summere opp tidlegare forsking for å sjå på effekten av å bruke sedasjonsprotokoll til sederte respiratorpasientar.

Metode Ein systematisk oversikt med randomiserte kontrollerte studiar er utført. Det er gjennomført systematiske søk i databasane Embase (OVID), Cochrane Central Register of Controlled Trials (CENTRAL), Medline (EBSCO), Cinahl (EBSCO), Academic Search Elite (EBSCO) og Epistemonikos – i februar 2019. Det er sett opp fire utfallsmål i denne systematiske oversikta; varigheit av respiratorbehandling, lengde på intensivopphald, lengde på sjukehusopphald og mortalitet. Det er nytta metaanalyse og narrativ syntese i analyse av data. GRADE vart brukt til å vurdere kvaliteten på dokumentasjonen.

Resultat Sju RCT studiar møtte inklusjonskriteria. Metaanalysen viser signifikant lågare risiko for mortalitet for pasientar som mottek sedasjonsprotokoll, samanlikna med pasientar som ikkje får sedasjonsprotokoll, Risk Ratio 0,89 (95% konfidensintervall 0,79; 0,99). Den samla dokumentasjonen bak samanlikninga vart gradert til låg kvalitet og det er avgrensa tillit til effektestimatet. For dei resterande utfallsmåla varigheit av respiratorbehandling og lengde på intensivopphald og sjukehusopphald vart det utført ei narrativ syntese der ein ikkje finn sikker effekt av sedasjonsprotokoll. Fleire av dei inkluderte studiane hadde høg og uklar risiko for systematiske skeivheiter.

Konklusjon Bruk av sedasjonsprotokoll gir signifikant lågare dødelegheit når samanlikna med ordinær subjektiv vurdering av sedasjonsdjupne, men effektestimatet ligger nær nulleffektslinja, og kvaliteten på den samla dokumentasjonen er vurdert til låg kvalitet. For dei andre utfallsmåla finn ein ingen konsistent effekt av sedasjonsprotokoll. Fleire av dei inkluderte studiane visar effekt i favør av sedasjonsprotokoll, men det er behov for fleire RCT studiar av god kvalitet for å kunne fastslå sikker effekt av sedasjonsprotokoll.