Den indre smerten som ingen ser – vald i nære relasjonar

Abstract

Tittel: Den indre smerten som ingen ser – vald i nære relasjonar Bakgrunn: I psykiatripraksis møtte eg ei kvinne, med diagnosen posttraumatisk stressliding, som var i reetableringsfasen etter å ha levd med vald i nære relasjonar. Forsking viser at det er ein klar samanheng mellom vald og seinare fysisk og psykisk uhelse, som kan medføra sosial isolering og nedsett deltaking i arbeidslivet og samfunnsaktivitetar. Det er difor viktig at sjukepleiarar har kunnskap om symptom på vald, kva konsekvensar det kan medføra, og korleis ein skal etablera ein god og trygg relasjon med dei valdsutsette for å fremja betring, slik at dei på nytt kan delta i arbeidslivet og sosiale aktivitetar. Problemstilling: Korleis kan ein som sjukepleiar bidra til å fremja betring og resiliens hjå kvinner som har vore utsette for vald i nære relasjonar? Metode: Denne oppgåva er ei litteraturstudie, som systematiserer kunnskap frå skriftlege kjelder, slik som bøker og forskingsartiklar, i tillegg til erfaringsbasert kunnskap. Oppsummering: Kvinner som har vore utsette for vald i nære relasjonar, vil i reetableringsfasen ha behov for mykje hjelp og støtte. Forsking viser at med riktig behandling tilpassa individuelle behov vil dei fysiske og psykiske plagene til valdsutsette kvinner reduserast over tid. I reetableringsfasen er det viktig at sjukepleiarar etablerer ein god og trygg relasjon med dei valdsutsette og tek omsyn til individuelle behov som kan variera over tid. Dette kan, saman med god støtte frå det sosiale nettverket, bidra til å fremja betring og resiliens hjå desse kvinnene.