Det handlar om å bli kjent med kvarandre : samhandling mellom primærhelsetenesta og døgnavdeling i distriktspsykiatrisk senter

Abstract

Bakgrunn: I 2012 kom Samhandlingsreforma som for alvor sette søkelyset på samhandling mellom primær- og spesialisthelsetenesta. Innan psykisk helsevern for vaksne har det vore lite forsking på samhandling og det er difor eit behov for å rette merksemda mot dette feltet. Hensikt: Hensikta har vore å få betre forståing av tilsette i kommunar sin ståstad og slik bidra til kunnskap som kan betre samhandlingsrelasjonen. Problemstilling: Kva kjennskap og forventningar har tilsette i primærhelsetenesta til døgnbehandling ved eit distriktspsykiatrisk senter? Metode: Studien byggjer på kvalitativ metode for å undersøkje førstepersonperspektivet til kommunehelseaktørane som går inn i samhandling. Data i studien er frå 3 fokusgruppeintervju med 17 deltakrar frå 8 kommunar. Datagrunnlaget har vorte analysert ved systematisk tekstkondensering. Resultat: Det er variasjon i helsetilstanden til menneske som primærhelsetenesta tilviser for behandling, samt at det er variasjon i kva dei tenker eit opphald ved distriktspsykiatrisk senter inneheld. Utskriving til kan vere spesielt utfordrande. Eit sentralt funn, er at det er eit stort behov for at fagfolk i ulike tenestenivå vert kjent med kvarandre. Konklusjon: Tilsette i ulike tenestenivå har nytte av å verte betre kjent med kvarandre for å kunne samhandle på ein betre måte. For å lukkast med dette må ein snakke med kvarandre ansikt til ansikt. Dette fører til at ein kan oppnå tillit og anerkjenning av «den andre». Utan anerkjenning av kvarandre sin faglege kompetanse, synest god samhandling å verte vanskeleg. Nøkkelord: Samhandling, primærhelseteneste, distriktspsykiatrisk senter, døgnbehandling