Effekt av fysisk aktivitet/trening samanlikna med andre sekretmobiliserande teknikkar for personar med cystisk fibrose, ein systematisk oversikt

Abstract

Formål: Evaluere effekt av fysisk aktivitet/trening på sekretmobilisering, samanlikna med andre sekretmobiliserande teknikkar for personar med CF, og evaluere om det er former for fysisk aktivitet/trening som har betre effekt enn andre. Design: Systematisk oversikt Materiale og metode: Me har gjennomført søk i Cochrane CENTRAL; MEDLINE (Ovid); EMBASE(Ovid); CINAHL; AMED; SPORTDiscus; PEDro; supplert med søk etter grå litteratur; pågåande studiar; og gjennomgang av referanselister. Inklusjonskriterium: randomiserte, kontrollerte studiar; personar med CF uavhengig av alder; fysisk aktivitet/trening samanlikna med lungefysioterapi, pusteteknikkar, PEP, oscillerande utstyr eller ei anna form for fysisk aktivitet/trening. Utfall var lungeforverringar, livskvalitet, biverknader, luftstraum målt med spirometri og eliminering av sekret målt med ”Lung Clearance Index” eller lungescintigrafi. Resultat: Fire studiar blei inkludert for samanlikning lungefysioterapi, PEP og tredemølle samanlikna med ergometersykkel. Basert på få studiar med låg metodisk kvalitet har me låg tillit til resultata. Samanlikna med lungefysioterapi er det dokumentasjon for at fysisk aktivitet/trening gir større risiko for biverknader og har betre effekt på sputum og FEV1. Både lungefysioterapi og PEP har betre effekt enn fysisk aktivitet/trening på eliminering av sekret målt med lungescintigrafi. Det er ingen vesentlege skilnader for effekt på PEF og PEF:PIF for fysisk aktivitet/trening på tredemølle og ergometersykkel. Konklusjon: Me har svært låg tillit til dokumentasjon som føreligg for effekt av fysisk aktivitet/trening samanlikna med lungefysioterapi, PEP og ulike former for fysisk aktivitet/trening. Det er behov for vidare forsking og langtidsstudiar med god metodisk kvalitet som også måler viktige utfall som lungeforverringar og livskvalitet