Prosessen med å komme i arbeid etter langtidssjukefråvær blant personar med ”ubestemte” helseplager

Abstract

Bakgrunn: ”Ubestemte” helseplager utgjer ein stor del av det totale sjukefråværet. Sjukefråvær er ei stor belastning både for den enkelte og for samfunnet. For mange er det helsefremjande å vere i arbeid på tross av helseplager. Formål: Formålet med denne studien var å utforske førstepersonserfaringar blant personar med ”ubestemte” helseplager, knytt til erfaringar med å komme i arbeid etter langtidssjukefråvær. Auka innsikt i slike erfaringar kan bidra til utvida kunnskap om tilrettelegging for auka arbeidsdeltaking blant personar med ”ubestemte” helseplager etter langtidssjukefråvær. Problemstilling: Korleis erfarer personar med ”ubestemte” helseplager prosessen med å komme i arbeid etter langtidssjukefråvær? Metode: Studien har eit kvalitativt design, inspirert av fenomenologi. Det er gjennomført seks individuelle livsverdenintervju. Systematisk tekstkondensering blei nytta som analysemetode. Resultat: Eit overordna tema blei utvikla: Samspelet mellom anerkjenning, aksept og samhandling. Vidare blei seks tema identifisert: Å komme tilbake i same eller anna arbeid, Kontrasten mellom å oppleve støtte og mistillit frå leiar og kollegaer, Forventningar og reaksjonar i møte med hjelpeapparatet, Å lytte til kroppen er ein prosess over tid, Sosiale og praktiske utfordringar i tilværet som sjukmeldt, og Å handtere bekymringar og få avkopling. Konklusjon: Anerkjennande samhandling mellom den sjukmeldte, arbeidsgjevar, NAV og helsetenesta er avgjerande i prosessen med å komme tilbake i arbeid etter langtidssjukefråvær blant personar med ”ubestemte” helseplager. Nøkkelord: ”Ubestemte” helseplager, tilbake i arbeid, langtidssjukefråvær, anerkjenning, kroppsfenomenologi