Tiltaksplan: Auka deltaking, studentaktivitet og motivasjon i undervisning

Abstract

Rapporten tar utgangspunkt i utfordringa knytt til at få studentar deltek i undervisning ved HVL. Med dette som bakgrunn gav prorektor for utdanning, Anne Grethe Naustdal, arbeidsgruppa bak denne rapporten i oppdrag å kome med fagleg funderte innspel og forslag til aktuelle tiltak. Rapporten tar utgangspunkt i både kvalitative og kvantitative kjelder, inkludert skriftlege svar frå meritterte undervisarar, mottakarar av utdanningskvalitetsprisen og studentar frå Studenttinget og Studiebarometeret frå 2021, 2022 og 2023. Rapporten viser at HVL skårar lavt på undervisning og arbeidslivsrelevans og studentar rapporterer at dei vert meir motiverte for å delta når undervisninga opplevast som relevant for deira framtidige yrke. Andre faktorar som påverkar studentdeltaking og engasjement er: aktive læringsformer, samanheng i og mellom emne, trygt og inkluderande læringsmiljø, relasjonar mellom studentar og mellom studentar og undervisarar. På bakgrunn av svara frå undervisarar og studentar, formulerer rapporten åtte råd kva som er god undervisning. Rapporten konkluderer blant anna med at undervisarar treng støtte i prosessen med å utvikle god undervisning. Eit tiltak er difor, i samarbeid med Avdeling for utviking av læring og undervisning (ALU), å tilby ein modul for emnedesign som skal støtte undervisarar i å utvikle ein meir samstemt undervisning. Eit anna tiltak er å starte ein pilot med kollegarettleiing, også i samarbeid med ALU, for å styrke samarbeid og erfaringsdeling mellom undervisarar i HVL.