Elevar sin skriftelege argumentasjon i dokumentasjon av koder i programmering

Abstract

I dagens digitale samfunn er kompetanse innanfor programmering blitt framheva og etterspurnad. Difor har dette kome tydeleg inn i matematikkundervisinga, der programmering blir oppfatta som ein kompetanse og eit verktøy for å utvikle matematiske ferdigheitar. Sjølv om læreplanen oppfattar ein klar kopling mellom matematikk og programmering (Kunnskapsdepartementet, 2019), så er det usikkerheit i forskingsfeltet over korleis ein skal utvikle og undervise begge fagfelta på ein likeverdig måte. I denne studien har det blitt fokusert på eleven sin dokumentasjon av koder, som ein relevant arbeidsmetode for både programmerings- og matematikkfeltet. På denne måten har eg gått nærmare inn på korleis eleven argumenterer kring val av kodar, ved at dei sjølv skriv kommentarar i programmet dei utviklar. Formålet med denne oppgåva er å få større kunnskap om korleis elevane strukturerer argumentasjonen sin i føring av dokumentasjonar og kva potensiale som finst hjå elevane. Oppgåva si problemstilling er følgande: «Kva for argumentasjonstrekk kan identifiserast i ungdomsskuleelevar sin dokumentasjon av kode i ein matematikkaktivitet?». For å svare på problemstillinga vart det gjennomført ein kvalitativ analyse, der seks elevar sin skriftelege argumentasjon vart samla inn og analysert ved hjelp av Toulmin sin modell (2003) og Krummheuer (1995) sin tilnærming til modellen. Elevane løyste matematikkoppgåver, ved bruk av tekstprogrammeringspråket Python, der hovudfokuset er på å dokumentere kvifor dei valde kodane til programmet. Datamaterialet bestod difor av elevane sine eigne tankar og sjølvvalde kodar, som såleis vart analysert og presentert som funn i studien. Funna gav innsikt i elevane sin struktur i argumentasjonen, der elevane viste både manglar og utfyllande argument. Nokre elevar viste til enkel argumentasjon, der fokuset var å skildre og fortelje målet til koden. Andre elevar fokuserte på å fremme eigen kompetanse for programmering, som ein støtte og eit grunnlag for koden sin eigenskap og formål. Ein utfordring i analysen var eleven sine implisitte utsegn, noko som var ein gjennomgåande faktor i datamaterialet. Eleven sitt val av oppsett og omgrep var også interessant, ettersom dette kunne fortelje noko om ulikskapen mellom eit avansert og enkelt språk, og mellom mange og få kommentarar. Funna frå denne studien viser at elevane argumenterar utifrå ein gitt kontekst, der kompetanse, fagleg sjølvtillit og forventingar er døme på faktorar som spelar inn på eleven sin skriftelege argumentasjon