dc.description.abstract | Formålet med masteroppgåva er å undersøke korleis tilsette i kommunal- helse- og omsorgssektor opplever at leiar fylgjer opp sjukefråvær. Hovudmålet har vore å finne ut i kva grad tilsette i denne sektoren opplever at leiar gir god oppfølging ved sjukefråvær. Eg har i tillegg vore interessert i sjå på i kva grad faktorar som støtte, autonomi, motivasjon, rolleklarheit, tett oppfølging og tilrettelegging spelar inn på opplevd oppfølging.
Data til undersøkinga er henta frå ei elektronisk spørjeundersøking som vart gjennomført i februar 2020. 137 tilsette i tre utvalde kommunar har svara på heile eller delar av undersøkinga. Det vart nytta kvantitativ tilnærming for å svare på problemstillinga og statistikkprogrammet Statistical Package for Social Sciences (SPSS) vart nytta til å analysera datamaterialet.
Meistringsorientert leiing og situasjonsbestemt leiing har vorte nytta som teoretiske utgangspunkt for utforminga av spørjeundersøkinga og analysane.
Undersøkinga viser at 80,7 % vurderer det som at dei har fått god oppfølging frå leiar ved sjukefråvær og 73,9 % vurderer det som at dei har fått den oppfølginga dei kunne tenkt seg. Hovudfunna viser at det er signifikant samanheng mellom alle faktorane og opplevd god oppfølging, men samanhengen mellom motivasjon, støtte, tett oppfølging, tilrettelegging og god oppfølging er sterkare enn for rolleklarheit, autonomi og god oppfølging. Samanhengen mellom god oppfølging og bruk av rutine er også sterk, men svakare enn dei andre faktorane. | en_US |